08 ഒക്‌ടോബർ 2014

അജ്ഞാതമായ ജീവിതാദ്ധ്യായങ്ങള്‍..!

Buzz It
ജനിക്കുമ്പോഴേ പേടിയുള്ളതുകൊണ്ടാണ്
നമ്മള്‍ ഒറ്റക്കരച്ചില്‍ കരയുന്നത് ,
നിര്‍ത്താതെ കരയും .. അമ്മയുടെ ചൂട് കിട്ടുന്നതുവരെ.
അതുവരെയുണ്ടായിരുന്ന ചൂട് നിലനിര്‍ത്താനുള്ള
വാശിയോടെയുള്ള കരച്ചില്‍..!

പിന്നെ വളരുന്തോറും കരച്ചിലിന്‍റെ ആവൃത്തി കുറയും,
ചുറ്റുപാടുകള്‍ പരിചിതമാകുമ്പോള്‍ ക്രമേണ പേടിയും കുറയും.
പിന്നെപ്പിന്നെ നേരമ്പോക്കിന് ഇടക്കിടെ പേടിക്കാറും കരയാറുമുണ്ട്..
കൌമാരമൊക്കെ കടന്ന് ചിറക് കുടഞ്ഞ്
പറന്ന് തുടങ്ങുമ്പോള്‍ ജീവിതത്തോടു തന്നെ ഒരു പേടി തോന്നും.
ഇനിയെന്തെന്ന് വിചാരിച്ച് കുണ്ഠിതപ്പെടും..!
ജോലിയും കൂലിയുമില്ലാതെ വലിയ അന്ധകാരത്തില്‍ പെട്ട്
മനസ്സ് എന്തിനെന്നില്ലാതെ വിങ്ങിപ്പൊട്ടും..
മൂല്യങ്ങളോടും മാമൂലുകളോടും നിഷേധാത്മകത പ്രകടിപ്പിച്ച്
ജീവിതത്തെ നോക്കി അന്ധാളിച്ച് നില്‍ക്കും..
ആര്‍ദ്രകണികളിലെവിടെയൊക്കെയോ തിളക്കമാര്‍ന്ന കണ്ണുകള്‍ ചൊരിയുന്ന
വൈദ്യുത നോട്ടങ്ങളെ താലോലിച്ചുകൊണ്ട്
ഒന്നുമുരിയാടാനാകാതെ വിമ്മിട്ടപ്പെട്ട ദിനങ്ങളുമുണ്ടാകാം..
ആരുമില്ലാതിരിക്കുമ്പോള്‍ അങ്ങനെയൊക്കെ തോന്നുക
സ്വാഭാവികം..
ആരെങ്കിലുമുണ്ടെങ്കില്‍ത്തന്നെ വിഷമം പങ്കുവെയ്ക്കാന്‍
പറ്റിയെന്ന് വരില്ല..കാരണം വിവരാണാതീതമായ , അതിസങ്കീര്‍ണ്ണമായ വ്യാപാരങ്ങളിൽപ്പെട്ട് മനസ്സ് ഉഴലുകയാവാം ..
കത്തിനില്‍ക്കുന്ന സൂര്യന്റെ ചൂടില്‍
മനസ്സില്‍ സ്വയം സൃഷ്ടിക്കപ്പെട്ട ഉത്കണ്ഠകളില്‍
ഒതുങ്ങിക്കൂടിയിരിക്കുന്ന കാലം..
അന്തസ്സു്, അഭിമാനം , ദുരഭിമാനം എന്നിവ വേറേയും..
സ്വന്തം മുഴക്കോലില്‍ അളക്കാന്‍ കഴിയാത്ത
സമൂഹത്തിന്‍റെ വിവേചന വിരല്‍ചൂണ്ടലുകളില്‍
മുഖമമര്‍ത്തി തേങ്ങിപ്പോകുന്ന ഒരു കാലഘട്ടം..
കൗതുകപ്രദങ്ങളായ വസ്തുക്കള്‍ പണമില്ലാത്തതുകൊണ്ട്
നിഷേധിക്കുക വഴി അപകര്‍ഷതാ ബോധത്തില്‍ ആണ്ടുപോകാം..
പതുക്കെ അതൊക്കെയുമായി ഇണങ്ങിച്ചേര്‍ന്ന് തട്ടിയും മുട്ടിയും
മുന്നോട്ട് പോകുമ്പോള്‍ എന്തെങ്കിലും ജോലിയൊക്കെ കിട്ടും..
കിട്ടിയ ജോലി പോകുമോയെന്നോര്‍ത്ത് ആധിയുണ്ടാകാം..
ആധിയും വ്യഥകളും കടന്ന് എതാണ്ടൊക്കെ
ജീവിതത്തിന്നുറപ്പായെന്ന് കരുതുമ്പോള്‍
കരച്ചിലിന് ഒരു ശമനമൊക്കെ വരും.

യൌവ്വനം അവസാനിക്കുന്നതുവരെ വലിയ
പേടിയില്ലാതെ, കരച്ചിടക്കി ജീവിതയാത്ര തുടരാം..!
വ്യത്യസ്തമായ ചൂടുകള്‍ക്ക് വേണ്ടി പോരടിച്ച്
വിജയവും പരാജയവുമേറ്റുവാങ്ങുന്ന കാലം..
കാലം കനിഞ്ഞു നല്‍കിയ യൌവ്വന വേഗങ്ങള്‍ ..
യൌവ്വനത്തില്‍ ജീവിതം ശക്തിവിശേഷങ്ങളുടെ പ്രതിരൂപങ്ങളോട്
ഇണങ്ങി നില്‍ക്കുന്നവെന്ന് ഉറച്ച് വിശ്വസിക്കാം.
ആ ശക്തിവിശേഷങ്ങള്‍ അനവരതം പ്രതിപ്രവര്‍ത്തനം
നടത്തി നമ്മെ മുന്നോട്ട് നയിക്കുന്നു
കാലപ്രയാണത്തില്‍ കൂട്ടുകൂടിയവരും , കൂടിച്ചേര്‍ന്നവരും ,
കൂടെയുള്ളവരും പിരിയുകയും ,ദൂരേയ്ക്കകലുകയും ചെയ്യുമ്പോള്‍
മനസ്സ് വിങ്ങിക്കരയുന്നുണ്ടാവും,.
അപ്പോഴൊക്കെ വ്യക്തിത്വശക്തിയെ വികസിപ്പിച്ചെടുത്ത പ്രസരിപ്പ്
വികാരങ്ങളെ നിയന്ത്രിക്കാന്‍ കഴിയുന്ന രീതിയില്‍
നമ്മെ അവസരത്തിനൊത്ത് ഉയര്‍ത്തി നിര്‍ത്തിയേക്കാം..

ധൈര്യം സംഭരിച്ച് മുന്നോട്ട് നീങ്ങുമ്പോള്‍
പിന്നെയും പേടിയുടെ ആധിക്യം കൂടിക്കൂടി വരും...
അത് ജീവിക്കുന്നതിന്‍റെ അല്ല , ജീവിതം തീര്‍ന്നുവരുന്നതിന്‍റെ പേടി..
വീണു പോകുന്നതിന്‍റെ പേടി..ഒറ്റയ്ക്കാകുന്നതിന്‍റെ പേടി..
ആ പേടികാരണം നാസ്തികന്‍ ചിലപ്പൊ ദൈവ വിശ്വാസിയാകും..
അങ്ങനെയായില്ലെങ്കില്‍ത്തന്നെ മറ്റാരുമറിയാതെ
ഉള്ളിന്‍റെയുള്ളില്‍ പ്രാര്‍ത്ഥിക്കുന്നുണ്ടാവാം..
ശരിക്ക് പ്രാര്‍ത്ഥിക്കുമ്പോള്‍ കരയാറുമുണ്ടാകാം..
ഭാരമുള്ള കരിമ്പടത്തിനുള്ളിലെ ജീവന്റെ ചൂടില്‍ ആത്മാവിന്റെ പശിമ
നിലനിര്‍ത്താനുള്ള മത്സരത്തില്‍ തോറ്റുപോകാം...
കാലമടിച്ചേൽപ്പിച്ച പൊരുത്തപ്പെടാനാകാത്ത വ്യാകുലതയെ
വ്യക്തിപരമായി നേരിടുന്നതിന്‍റെ വിഷമസന്ധികളിലൂടെയുള്ള യാത്ര..
കോപ താപ പാരുഷ്യങ്ങളുമായി സമരസപ്പെടുമ്പോഴും
മനസ് പറയുന്നിടത്ത് ശരീരമെത്താതെയാകുമ്പോള്‍ ഹൃദയം കൊണ്ട് കരയും..
എന്തിനു കരയുന്നുവെന്ന് ചോദ്യങ്ങളുണ്ടാവുന്നതുകൊണ്ടും
കരച്ചിലിന് ഉത്തരമില്ലാത്തതുകൊണ്ടും ..ആരും കാണാതെ കരയാം....!
കരഞ്ഞ് കരഞ്ഞ് കണ്ണീര്‍ വറ്റിപ്പോയതുകൊണ്ട് ..കണ്ണുകള്‍ നിറഞ്ഞ് തൂവണമെന്നില്ല ..
മനുഷ്യനെതിരെ കാലം നിരന്തര സംഘട്ടനത്തില്‍ ഏര്‍പ്പെടുകയും
കാലം വെല്ലുകയും ചെയ്യുന്നു..
ജീവന്‍റെ ചൂട് നഷ്ടപ്പെടുന്ന ആ നിമിഷങ്ങളില്‍ എന്തിനു
കരയുന്നുവെന്നുപോലുമറിയാതെ നിര്‍വ്യാജമായി പേടിക്കും..

____________________________________
‪#‎അജ്ഞാതമായ‬ ജീവിതാദ്ധ്യായങ്ങള്‍..!


01 ഒക്‌ടോബർ 2014

കുണ്ഡലിനി..!!

Buzz It


കുണ്ഡലിനി.. കുണ്ഡലിനി എന്ന് കേട്ടിട്ടുള്ളതല്ലാതെ എന്താണ് സംഭവം എന്ന് പലര്‍ക്കും പിടിയില്ല..! ഈ സരസവും ദുര്‍ഘടവുമായ പദം കേള്‍ക്കുമ്പോള്‍ത്തന്നെ ഒരു ചെറു പുഞ്ചിരി വിടരും , ദേ..ഇപ്പൊ നിങ്ങള്‍ക്ക് ഒരു ചിരി വന്നില്ലെ..അതാണ് നുമ്മള്‍ പറയാന്‍ പോകുന്ന കുണ്ഡലിനി..!! കുണ്ഡലിനി എന്ന് പറഞ്ഞാല്‍ നുമ്മക്ക് ബാബാ രാംദേവിനെയോ , സ്വാമി നിത്യാനന്ദയൊ വരെ ഓര്‍മ്മ വരും. അവരുടെ കുണ്ഡലിനി ഉണര്‍ത്തല്‍ പ്രസിദ്ധമാണല്ലൊ..! യോഗചെയ്ത് കുണ്ഡലിനിയെ ഉണര്‍ത്തിയെടുക്കുന്നവരും , എന്നാല്‍ ഒരു ചുക്കും ചെയ്യാതെ സ്വന്തം കുണ്ഡലിനിയെ അവഗണിക്കുന്നവരുമുണ്ട്. ഭൂരിഭാഗവും ഈ രണ്ടാമത് പറഞ്ഞ കൂട്ടത്തിലാണ്. സ്വന്തമായി നല്ല ഒന്നാംതരം കുണ്ഡലിനിയുള്ളവര്‍ പോലും വല്ലവരുടേയും ‘ഓഞ്ഞ’ കുണ്ഡലിനിയെ പൊക്കിപ്പറഞ്ഞ് പ്രതിപക്ഷ ബഹുമാനമുണ്ടെന്ന് നടിക്കുന്ന കലികാലമാണ് ഇത്. അദ്ധ്യാത്മസാധനകൊണ്ട് മനുഷ്യശരീരത്തില്‍ അന്തര്‍ലീനമായിക്കിടക്കുന്ന അതിബൃഹത്തായ മൂലശക്തിയെ ഉണര്‍ത്തിയെടുത്ത് നമുക്ക് ചര്‍ച്ചിച്ച് ചര്‍ച്ചിച്ച് മുന്നോട്ട് പോകാം.!

ആരാധ്യരായ യോഗഗുരുക്കാന്മാരുടെ കുണ്ഡലിനിയെ ഒന്നു ബഹുമാനപുരസ്സരം താണുവണങ്ങി എന്താണ് കുണ്ഡലിനിയെന്ന് പരിശോധിക്കാം. മനുഷ്യന്‍ ഉണ്ടായ കാലം മുതല്‍ അവര്‍ക്കെല്ലാം സ്വന്തായി കുണ്ഡലിനിയുമുണ്ട്, കൃത്യമായി പറയുകയാണെങ്കില്‍ സ്പൈനല്‍ കോഡിന്റെ [സുഷുമ്‌ന നാഡി] ഏറ്റവും താഴത്തെ അറ്റത്താണ് ഈ കുണ്ഡലിനി എന്ന് പറയുന്ന സംഭവം സ്ഥിതിചെയ്യുന്നതെന്നാണ് പൊതുവെയുള്ള മതം. അവിടെ ചുരുട്ടിക്കൂട്ടി വച്ചിരിക്കുന്ന ‘എനര്‍ജി’ ഉണര്‍ത്തിയെടുത്താല്‍ അതു സ്പൈനല്‍ കോഡ് വഴി മുകളിലേയ്ക്ക് കയറും...പിന്നെ പോലീസ് പിടിച്ച് ഇടിച്ചാല്‍ പോലും ഒന്നും സംഭവിക്കില്യാ.! ആയതിനാല്‍ നാഡീ വ്യൂഹത്തിലെ അന്തര്‍വാഹികളും ബഹിര്‍വാഹികളുമായ വ്യാപാരവ്യവസായങ്ങള്‍ കേന്ദ്രീകൃതമായും അടുക്കുംചിട്ടയൊടും നിര്‍വ്വഹിക്കാന്‍ കുണ്ഡലിനിയെ ഉണര്‍ത്തേണ്ടത് ഏതൊരു ഇന്ത്യന്‍ പൌരന്റെയും ആത്യന്തികമായ കടമയാണ്..!

നമ്മുടെ ശാരീരിക പ്രവര്‍ത്തനങ്ങളെ സന്തുലിതപ്പെടുത്തുന്നവയാണ് ആഹാര രീതികളെങ്കിലും നമ്മുടെ സ്വഭാവവുമായും അത് ബന്ധപ്പെട്ടു കിടക്കുന്നു.
ആയതിനാല്‍ കുണ്ഡലിനി ഉണര്‍ത്തുന്നവര്‍ ആഹാര കാര്യത്തില്‍
പ്രത്യേക നിഷ്കര്‍ഷ പാലിക്കേണ്ടതാണ്.. ഒന്നു ചുരുക്കി വിവരിക്കാം..

1. രാവിലെ രണ്ട് ഇഡ്ഡലി കഴിക്കാം . നാട്ടിലാണെങ്കില്‍ 12 എണ്ണം വരെ ഈസിയായിട്ട് കൈകാര്യം ചെയ്യാം . ഇഡ്ഡലി & കുണ്ഡലിനി വായിച്ചാല്‍ പേരില്‍ ഒരു പ്രാസം ഇല്ലേ? അതാണതിന്റെ ഒരു ഇത്...!

2. ക്ലോക്കില്‍ മണി പന്ത്രണ്ട് അടിക്കുമ്പോള്‍ ഒരു ഓറഞ്ച്,ക്യാരറ്റ് ഫ്രെഷ് ജൂസ് ഒരു ഗ്ലാസ് നിര്‍ബന്ധമാക്കണം. നൊ ഐസ് , ആ തെണ്ടികള്‍ ഷുഗര്‍ ഇടാറേയില്ല..!

3.ഉച്ചക്ക് ചോറ് ..മീനില്ലെങ്ക്ലും സാരമില്ല മീഞ്ചാറെങ്കിലും മതി.
മീനിലെ ധാതു ലവണങ്ങള്‍ അലിഞ്ഞു ചേര്‍ന്ന് രാസപ്രവര്‍ത്തനം നടത്തിയ ‘ചാറ് ‘ കുണ്ഡലിനിയെ കുലുക്കി ഉണര്‍ത്താന്‍ കഴിവുള്ളവയാണ്..!

4.ഇടക്കിടയ്ക്ക് ബ്ലാക് ടീ . ഫ്ലേവനോയിഡുകളുടെ ബാഹുല്യം കുണ്ഡലിനിക്ക് അത്ഭുതാവമായ പ്രചോദനമാണ് നല്‍കുന്നത്. സുലൈമാനി കുടിക്കുമ്പോള്‍ വെറുതെ വയര്‍ ഉരുണ്ടുകേറുന്നത് കുണ്ഡലിനിയുടെ പ്രഭാവം ആണെന്ന് തെറ്റിദ്ധരിച്ചേക്കരുത്..

5. വൈകിട്ട് ഒരു കുബൂസ് [കുബൂസ് കിട്ടിയില്ലെങ്കില്‍ മാത്രം ചപ്പാത്തി..! ]
അല്പം ചിക്കങ്കറി..
ചിക്കങ്കറിയാ..? എന്നൊന്നും ചോദിക്കേണ്ട , ചിക്കനും മീനുമൊക്കെ വെജിറ്റേരിയന്‍ ആഹാരമാണ്. സിംഹം , കടുവ, പുലി ഇവറ്റകളുടെ മാംസം ഭക്ഷിച്ചാല്‍ നുമ്മളും നോണ്‍ വെജ് ആയിപ്പൊകും. അതുകൊണ്ട് കുണ്ഡലിനിയെ ഉണര്‍ത്താന്‍ പര്യാപ്തമായ ആഹാരം നാം പ്രത്യേകം തിരഞ്ഞെടുക്കേണ്ടതായിട്ടുണ്ട്.

ആത്മീയജ്ഞാനത്തിന്റെ അഭാവമാണ് മനുഷ്യര്‍ക്ക് മാനസികാരോഗ്യം കുറയാനുള്ള യഥാര്‍ത്ഥകാരണമെന്ന് പറയുമ്പോള്‍ ശ്വാസം പോലും നേരെ ചൊവ്വേ നിയന്ത്രിക്കാന്‍ കഴിയാത്ത മനുഷ്യര്‍ എത്ര നിസ്സാരന്മാരും അവര്‍ക്കെങ്ങനെ ആത്മീയജ്ഞാനം മുഴുവനായി ഉള്‍ക്കൊണ്ട് കുണ്ഡലിനിയെ പരിപോഷിപ്പിക്കാന്‍ കഴിയുമെന്ന് ഒരു ശങ്കയില്ലേ?. ശരീരത്തിനു സംഭവിക്കുന്ന ക്ഷയവും, വൃദ്ധിയും , മരണവുമെല്ലാം തന്റേതാണെന്നു തെറ്റിദ്ധരിച്ച് ജീവിക്കുന്നവര്‍ക്ക് കുണ്ഡലിനിയെപ്പറ്റി ചിന്തിക്കാന്‍ പോലും സമയം കിട്ടുമോ ..?!! ആത്മാവിന്റെ ശക്തിയെന്ന നിലയില്‍ കുണ്ഡലിനീ ശക്തിയെ തിരിച്ചറിയുകയും വികസിപ്പിക്കുകയും ചെയ്യുമ്പോള്‍ മനുഷ്യന്‍ ഒരു വെറും ശരീരമോ ബുദ്ധിയോ അല്ല; ആത്മാവുതന്നെയാണെന്ന് മനസ്സിലാക്കാനും മാനസികാരോഗ്യം വീണ്ടെടുത്ത് ഏതു ജീവിത പ്രതിസന്ധികളേയും ധൈര്യപൂര്‍വ്വം നേരിടാനും തരണം ചെയ്യാനും കഴിയുന്നുവെന്ന് യോഗിവര്യന്മാര്‍ അസന്നിഗ്ദ്ധമായി പ്രഖ്യാപിച്ചിരിക്കുന്നതൊക്കെ വായിച്ച് നുമ്മടെ കുണ്ഡലിനിയും ഉണര്‍ന്നു തുടങ്ങി..!! ഉണര്‍ന്ന കുണ്ഡലിനീപരിപോഷണത്തിനായി പരിശ്രമിക്കുമെന്ന് ഞാനിതാ സത്യം ചെയ്യുന്നു...! ജീവിതാസ്വാദനത്തിന്റെ ആത്മീയവ്യവഹാരത്തില്‍
അലിഞ്ഞ് ചേരാന്‍ നോം നിങ്ങളേയും സഹര്‍ഷം സാദരം സ്വാഗതം ചെയ്യുന്നു..

ഇനി ഏതെങ്കിലും യോഗഗുരുവിനെ എത്രയും പെട്ടെന്ന് സമീപിച്ച് ദക്ഷിണ വെക്ക്യാ.. ! കുണ്ഡലിനി ധൃതഗതിയില്‍ ഉണര്‍ത്തുക...!
സര്‍വ്വം മംഗളം ..ശുഭം.
______________________________________________
#എല്ലാകൂട്ടുകാര്‍ക്കും കുണ്ഡലിനി ഉണര്‍ത്തല്‍ ആശംസകള്‍ ..!!