27 ഫെബ്രുവരി 2013

ഒരു വെള്ളമടിക്കഥ..!!





ഇന്നലെ കുടിവെള്ളം ഓര്‍ഡര്‍ ചെയ്തു..
എപ്പോഴും ഓര്‍ഡര്‍ ചെയ്യുന്നപോലെ..
ഡീസ്പെന്‍സറില്‍ ഭദ്രമായിവച്ച് ‘ഡെലിവെറിക്കാരന്‍‘ ദുര്‍മുഖം കാട്ടി പുറത്തേയ്ക്ക് പോയി.. അവന്‍റെയൊക്കെ ഭാവം കണ്ടാല്‍ത്തോന്നും ഞാന്‍ നിര്‍ബന്ധിച്ച് പണി ചെയ്യിക്കുന്നുവെന്ന്..
‘Oasis’ സ്ഥിരമായി അടിക്കുന്ന വെള്ളം..
ഒരു ഗ്ലാസ് കുടിച്ചു...അരുചി..
ഒരു ഗ്ലാസൂടെ കുടിച്ചു.. വാട്ട് ദ ഹെല്ല്..അതേ വെടക്ക് രുചി.
ഇതെന്തു വെള്ളം..? ബാഡ് ടേസ്റ്റ്..
വെള്ളത്തിന് അല്ലെങ്കിലും രുചിയില്ല..
എന്തെങ്കിലും രുചി തോന്നുമ്പോഴാണല്ലൊ..പ്രശ്നം..!?

ഉടന്‍ വിളിച്ചു കസ്റ്റമെര്‍ കെയറില്‍.. 600522261.
എടുത്തതോ ഒരു അറബി..ഭയങ്കരന്‍..പ്രതാപശാലി... മുദീര്‍ [ മാനേജര്‍]
ആരാ.. എന്താ.. നുമ്മടെ അഡ്രസ് വരെ വാങ്ങി.
അവന്‍റെ Oasis വെള്ളം പരിശുദ്ധമാണെന്നും
വെള്ളത്തിന്‍റെ ട്രീന്‍റ്മെന്‍റ് മുതല്‍ ബോട്ട്ലിംങ്ങ് വരെ ഫോണിലൂടെ ക്ലാസ് തന്നു..
അങ്ങനെ പറഞ്ഞ് പറഞ്ഞ് പ്രശ്നം വഴിതിരിഞ്ഞു..
അവസാനം അവനെന്‍റെ ‘വാട്ടര്‍ ഡിസ്പെന്‍സറിനിട്ട്‘ വാക്കുകളാല്‍ നാലഞ്ച് തൊഴി..!
പിന്നെ ഒന്നും നോക്കിയില്ല.. ഞാന്‍ കേസുകൊടുക്കുമെന്ന് ഭീഷണി മുഴക്കി..
ഈ വെള്ളം ഞാന്‍ ലാബില്‍ ടെസ്റ്റ് ചെയ്യിക്കും,
മുന്‍സിപ്പാലിറ്റിയില്‍ കമ്പ്ലയിന്‍റ് കൊടുക്കും..
ടെസ്റ്റ് റിസള്‍ട്ട് വച്ച് നിന്‍റെ കമ്പനിക്കെതിരെ കേസ് എടുപ്പിക്കും..
ഒരു മില്യന്‍ നഷ്ടപരിഹാരമായി വാങ്ങും..
മാക്സിമം വിരട്ട്..
മ്മടെടുത്താ അറബീന്‍റെ ഉടായിപ്പ്..ഹും..

ഫ്ലൈറ്റില്‍ നാട്ടിലേയ്ക്ക്  യാത്ര ചെയ്യുന്ന സീനില്‍ ഒരു കാളിങ്ങ് ബെല്ല്..
ങ്ങേ.. അതിരാവിലെ വീണ്ടും കാളിങ്ങ് ബെല്ല്..വീടെത്തുന്നതുവരെപ്പോലും സ്വപ്നം കാണാന്‍ സമ്മതിക്കാത്ത പഹയന്മാര് ..
കതകുതുറന്നതും ദാ നില്‍ക്കുന്നു നാലഞ്ച് തടിമാടന്മാര്‍ ..
‘അടിയാണെങ്കില്‍ അടി’ എന്ന് മനസില്‍ ഉറപ്പിച്ച് ബോഡി ലാങ്ങ്വേജ് ഒന്നു ചേഞ്ച് ചെയ്തു..
‘ഗുഡ് മോണീങ്ങ് സര്‍ ,വി ആര്‍ ഫ്രം Oasis ‘
അയ്യേ..ഇത്ര രാവിലെയോ..പേടിത്തൂറികള്‍
ഞാന്‍ ചുമ്മാ വെരട്ടിയതല്ലെ..

‘ഓകെ കം ഇന്‍’
അവന്മാര്‍ക്ക് ഓരോ ഗ്ലാസ് ഒഴിച്ച് കുടിക്കാന്‍ കൊടുത്തു..
‘പ്ലീസ് ഹാവിറ്റ്..  ‘
ടച്ചിങ്ങ്സ് വല്ലതും വേണോ എന്ന് ചോദിക്കാന്‍ തോന്നുമാറുള്ള അവ്ന്മാരുടെ കുടി..
വെടക്ക് രുചി ഉണ്ടെന്ന് അവര്‍ ഒന്നടങ്കം സമ്മതിച്ചു..
‘ക്യാന് വി ടേക് ഇറ്റ്..?’
പുതിയ ബോട്ടില്‍ വച്ച് .. കുറെ വെള്ളം ഊറ്റിക്കളഞ്ഞു..
അതില്‍ നിന്നും ഓരോ ഗ്ലാസ് കുടിപ്പിച്ചു..
നല്ല നൈസ് വെള്ളം..!!
വെള്ളത്തിനു സ്തുതി.. വാട്ടര്‍ ഡീസ്പെന്‍സര്‍ എന്നെ ചതിച്ചില്ല..!

“സര്‍ , വി വുഡ് ലൈക് റ്റു ഗിഫ്റ്റ് യു 5 Oasis ബോട്ടിത്സ് ..!”
ഈ തടിയന്മാര്‍ ഇത്രയും നല്ലവന്മാരായിരുന്നോ.? എല്ലാം അറബീന്‍റെ കളിയാ..
‘നോ താങ്ക്സ്..‘
ഞാന്‍ കട്ടായം പറഞ്ഞു..
നുമ്മക്കെന്തിനാ വല്ലവന്‍റെയും ഹറാം..ല്ലേ.!
ഇപ്പോള്‍ കൊണ്ടുവന്ന ബോട്ടിലിന്‍റെ പണം നിര്‍ബന്ധിച്ച് നല്‍കി അവന്മാരെ ഒരു വിധത്തില്‍ ഒഴിവാക്കി ദിനചര്യകളിലേക്ക് മടങ്ങി ഈയുള്ളവന്‍..!

_______________ശുഭദിനം _______________





25 ജനുവരി 2013

64-മത് റിപബ്ലിക് ദിനാഘോഷവും ആശംസകളും



ഷഷ്ടിപൂര്‍ത്തി ആഘോഷിച്ച ഇന്ത്യന്‍ പാര്‍ലിമെന്‍റിന് അഭിനന്ദനങ്ങള്‍ ..

എന്താണ് റിപബ്ലിക് ദിനം ?
ഇന്ത്യന്‍ ഭരണ നിയമങ്ങള്‍ നിലവില്‍ പ്രായോഗികമാക്കപ്പെട്ട ദിവസം ..!
നനാത്വത്തില്‍ എകത്വം- എന്തോന്നിത്?
മതേതരത്വം- മഷിയിട്ടു നോക്യാല്‍ പോലും കിട്ടില്ല..
ജനാധിപത്യം- ഹ്ഹ്ഹ്ഹ് ഒരു പുച്ഛച്ചിരിമാത്രം..
തുല്യ നീതി - ?
സാമൂഹ്യസമത്വം -??
വിശ്വാസ സ്വാതന്ത്ര്യം-???
ന്യൂനപക്ഷ പരിരക്ഷ -????
ചോദ്യ ചിഹ്നങ്ങളില്‍ തൂങ്ങിമരിച്ച വെറും വാക്കുകളെ പോസ്റ്റ്മോര്‍ട്ടം ചെയ്താല്‍ ഏത്  ഇന്ത്യന്‍ പൌരനും ഞെട്ടിപ്പോകും. പ്രസംഗങ്ങളിലും അധികപ്രസംഗങ്ങളിലും മാത്രം കേട്ടുമടുത്ത് മുഷിഞ്ഞ് ചതഞ്ഞ വാക്കുകള്‍..!!




എല്ലാ റിപബ്ലിക് ദിനത്തിലും വീരജവാന്മാര്‍ക്കും പോലീസ് സേനാംഗങ്ങള്‍ക്കും വിശിഷ്ട വ്യക്തികള്‍ക്കും പുരസ്കാരങ്ങള്‍ നല്‍ക്കി ആദരിക്കാറുണ്ട്. ഇപ്പോള്‍ ഇതൊക്കെ നാലഞ്ച് ചാക്ക് ആയിരത്തിന്‍റെ നോട്ടുകള്‍ കൊടുത്തു വാങ്ങിക്കാമെന്നായിരിക്കുന്നു..

ഓരോ ഇന്ത്യക്കാരന്‍റെയും അധ്വാനത്തിന്റെ, വിയര്‍പ്പിന്റെ ഓഹരി കൃത്യമായി സര്‍ക്കാരിന് നികുതിപ്പണമായി അടച്ച്  അതിര്‍ത്തിയില്‍ ജാഗരൂകരായിരിക്കുന്ന ജവാന്മാര്‍ മുതല്‍ ഇങ്ങ് താഴേത്തട്ടിലെ ‘കൂതറ’ ജനപ്രതിനിധികള്‍ക്ക് വരെ ശമ്പളവും ബത്തയും കൊടുക്കുന്ന നമ്മുടെ ഇന്ത്യ.  നമ്മുടെ നാട്ടിലെ പട്ടിണി, ദാരിദ്ര്യം, താറുമാറായ റോഡുകള്‍, കാലിത്തൊഴുത്തുപോലുള്ള സര്‍ക്കാര്‍ സ്കൂളുകളും സര്‍ക്കാര്‍ ഓഫീസുകളും, മൂക്കുപൊത്തി നടക്കേണ്ടിവരുന്ന നഗരങ്ങള്‍ തുടങ്ങി പറയാനേറെയുണ്ട്. നികുതിപ്പണത്തിന്റെ സൌകര്യങ്ങളും, അവസരങ്ങളും നഗരത്തിലുള്ളവര്‍ക്ക് മാത്രമല്ല, ഗ്രാമങ്ങളിലേക്കും തുല്യതയോടെ ഇനിയും വിനിയോഗിക്കപ്പെടുന്നില്ല . അഴിമതി വികസനത്തെ കവച്ചു വെയ്ക്കുന്ന ഇന്ത്യയില്‍ അഴിമതിസമരത്തെ തകര്‍ക്കാന്‍  അയല്‍രാജ്യത്തെ വിനിയോഗിച്ച് ‘രാജ്യസ്നേഹം’ പൊലിപ്പിച്ചെടുക്കാന്‍ കഷ്ടപ്പെടുന്ന അഴിമതിയില്‍ മുങ്ങിക്കുളിച്ച് രാഷ്ട്രാന്തരീയ കുത്തകളുടെ കോണകം കഴുകുന്ന ഭരണപടുക്കള്‍ ..!!



ഇന്ത്യ...നാളെ സല്യൂട്ട് ചെയ്യുന്നത് ആരെയൊക്കെയാണ്? നമ്മുടെ ജവാന്മാര്‍ നാളെ സല്യൂട്ട് ചെയ്യേണ്ടത് ആരെയാണ്? ഒരു ബലാത്സംഗക്കേസും അതിന്‍റെ ജനകീയ ന്യൂജനറേഷന്‍ സമരവും പോലും സഹിഷ്ണുതയോടേ നേരിടാന്‍ കഴിയാതെ വര്‍ഗ്ഗീയ വല്‍ക്കരിക്കുകയും വഴിതിരിച്ചു വിടുകയും ചെയ്ത് അതിന്‍റെ ഞെട്ടലില്‍ നിയമങ്ങള്‍ തന്നെ ഉടനടി മാറ്റിയ ദുര്‍ബലമായ ഭരണകൂടത്തെയൊ? അതോ ഇന്ത്യക്കാരുടെ നികുതിപ്പണമായ ബില്യണ്‍സ് സ്വിസ് ബാങ്കുകളിലേക്ക് ഒഴുക്കുകയും അതിന് സഹായിക്കുകയും ചെയ്യുന്ന ഭരണകര്‍ത്താക്കളെയോ?

അധ്വാനിച്ച് ജീവിക്കുന്നവരും  സാധാരണക്കാരുമായ എല്ലാ ഇന്ത്യക്കാര്‍ക്കും ഒരിക്കല്‍ക്കൂടി റിപബ്ലിക് ദിനാശംസകളും സല്യൂട്ടും..!!
_______________ശുഭദിനം _______________

വിരോധാഭാസനുമായി സംസാരിക്കാൻ

നാമം

ഇമെയില്‍ *

സന്ദേശം *